第4屆新秀歌唱大賽 (1985)

這屆出現最多現在仍有人記得的歌手/藝人, 有些後來有機會出碟, 有些做了演員, 有人做了電視體育記者.
* 金獎 杜德偉
* 銀獎 蘇永康
* 銅獎 林楚麒
* 最突出台風創新獎 莫鎮賢
* 落選參賽者 : 江欣燕、黃寶欣、吳國敬、蔡富華、瞿培英; [未能晉身決賽 : ] 李克勤、周慧敏、陳雅倫、草蜢 (仔)、郭政鴻 (參賽時名字郭錦雄)、陳雅倫、陳佩珊、李明珠、梁雁翎

鄧麗盈 梁朝偉 (1985) 第4屆新秀
呢年決賽MC係鄧麗盈和梁朝偉, 查實鄧麗盈85年已出第一張兼唯一唱片, 代表作西歌"溶解我", 她是第一代鄧走音, 只能做一碟歌手; 而梁朝偉86年在華星出"朦朧夜雨裡", 音準亦相當朦朧, 出完兩張碟後等到93年出國語碟再翻紅.

蔡富華
參賽歌曲"愛在深秋", 梁朝偉介紹他職業是體育記者, 落選後做回本行, 入過TVB新聞部, 之後去亞視, 現任有線電視體育組主管, 唔知有無閒時唱兩嘴呢。

黃寶欣
18歲, 參賽歌曲"我為你狂", 87年加盟銀星唱片出第一張碟"兩地情", 竟然賣出白金銷量, 嚇親好多人, 代表作當然係'酒杯敲鋼琴", EYT改佢名黃補身, 她曾改編多首Kylie Minogue快歌, 有西界Kylie之稱.

吳國敬
20歲, 參賽歌曲"愛不是遊戲", 頭髮略長, 唱起蔡楓華快歌皺起眉頭, 已有幾分憤怒, 88年入EMI"玩火"走搖滾路線, 自成一格, 之後起起跌跌, 轉型寫歌頗受歡迎, 傳佢自稱是Big Four的第五成員.

以前TVB搞大騷台下都星光熠熠, 梁朝偉話自己失戀經驗不多, 令人失戀比較多, 鏡頭一影觀眾, 曾華倩和吳君如就在大笑, 前面則是拍爛手掌的張國榮和表演嘉賓日本女歌手倉橋盧伊子.

瞿培瑛
參賽歌"長夜My Love Good Night", 88年簽約細公司, 出左張雜誌式封面的唱片, 主打歌"木偶點唱機", 又唱Madonna又唱Alan Tam, 不過無乜人識, 咁就消失了, 現在下落不明.

江欣燕
18歲, 參賽唱"再見Puppy Love", 比賽時甩beat走音, 但因青春可愛獲TVB簽約, 做青年大使, 88年在華星出過一張EP, 係咁多, 大多時間演趣劇, 扮梅艷芳, 代表作搽黑塊面扮賓妹Maria, 現於M Club演Cyndi Lauper跳健康舞.

最突出台風創新獎 莫鎮賢
20歲, 第二次參加新秀, 84年亦曾在十八區歌唱比賽的東區分賽與張學友碰頭並落敗, 赴日本學藝回來, 參賽歌"愛之神話 (日文)". 在華星出過雜錦碟, 直到90年入Rock-In才出第一張個人唱片, 後來做過設計和教唱歌, 近年重返樂壇.

銅獎 林楚麒
20歲, 參賽歌曲"蔓珠莎華", 臨尾被dancer撞跌咪但不慌不忙拾起繼續唱, 被讚具大將之風. 參加上海巴黎歌唱大賽憑"這就是愛"表現巨肺實力, 但在華星只出過一張個人唱片, 發展不如意. 93年在家駒喪禮自稱未亡人, Beyond成員和歌迷甚為抗拒, 近年短暫復出過.

銀獎 蘇永康
17歲, 參賽者之中最後生的一個, 樣睇唔出咁young, 唱Careless Whisper (日)+蔡國權"無心快語". 他在華星只出過雜錦碟, 89年簽約林慕德旗下細公司的'失眠"反應很好, 之後在新藝寶/正東發展不俗, 尤其"越吻越傷心", 02年台灣藏毒跌了一跤, 近年靠Big four都OK, 2011年重返東亞旗下的華星, 有首hit歌"那誰".

金獎 杜德偉
23歲, 唱"Hello", 參賽時已知他是中國歌后張露之子, 父親是菲律賓樂手, 走黑人音樂路線, 很快成為華星力捧對象, 87年出第一張大碟, 上過二線頭一線尾, 之後過檔華納, 被封為舞王之一 (與張立基, 草蜢等), 再過檔滾石在台灣紅過, 最近回歸香港樂壇.